काठमाडौँ । लमजुङ जिल्लाको सदरमुकाम बेसीशहरमा रहेको यूनिभर्सल बोर्डिङ स्कुलका दुई जना विद्यार्थीले ४ जिपिए प्राप्त गरेका छन् ।
बिहीबार सार्वजनिक भएको एसईई परिक्षाको नतिजा अनुसार विद्यालयका एक छात्र र एक छात्रा गरि दुई जना विद्यार्थीले ४ जिपिए प्राप्त गरेको विद्यालयले जनाएको छ । एसइइ परिक्षामा सहभागी भएका ६३ जना विद्यार्थी मध्य दुई जनाले उत्कृष्ट नतिजा ल्याउन सफल भएको विद्यालयका प्रिन्सिपल बिमल अधिकारीले जानकारी दिए ।
उनका अनुसार बेसीशहर नगरपालिका ७ का आयुष के.सी र बेसीशहर ८ का आयुष्मा गुरुङले यसवर्ष ४ जिपिए सहित उत्कृष्ट नतिजा ल्याउन सफल भएका हुन् । यस्तै, ४ जिपिए प्राप्त गर्ने दुई जना सहित ३० जना विद्यार्थीले उत्कृष्ट नतिजा प्राप्त गरेका छन् ।
३.६ देखि ४ जिपिए प्राप्त गर्ने ३० जना, ३.२ जिपिए देखि ३.६ जिपिए प्राप्त गर्ने २३ जना र २.८ जिपिए देखि ३.२ जिपिए प्राप्त गर्ने ९ जना रहेका छन् । एकजना विद्यार्थी भने अबर्गिकृतमा परेको विद्यालयले जनाएको छ ।
सार्वजनिक नतिजा अनुसार लमजुङ जिल्ला भरिमा ३ जना मात्र विद्यार्थीले ४ जिपिए प्राप्त गरेका छन् । ३ जना मध्य यूनिभर्सलका २ जना विद्यार्थी रहेको प्रिन्सिपल अधिकारीले बताए । ४ जिपिए ल्याउनेमा अर्को एक जना कुसुमाकर माध्यामिक विद्यालय मध्यनेपाल ७ का बिस्वास घिमिरे रहेका छन् ।
जिल्लाभरका सामुदायिक विद्यालयबाट घिमिरेले मात्र ४ जिपिए ल्याउन सफल भएका हुन् ।
देशभर १ सय ८६ जना विद्यार्थीले मात्र ४ जिपिए प्राप्त गरेको अवस्थामा युनिभर्सल एकेडेमीले जिल्लामै उत्कृष्ट नतिजा ल्याउन सफल भएको अधिकारीको दाबी छ । विद्यालयले प्रत्यके वर्ष निरन्तर रुपमा उत्कृष्ट नतिजा हाँसिल गर्दै आएको अधिकारीले बताए ।
यूनिभर्सल एकेडेमी प्याब्सन लमजुङको उत्कृष्ट विद्यालय हो । विद्यालयले शैक्षिक गतिविधि सँगै अन्य सिर्जनात्मक र रचनात्मक पद्धतीबाट पठन पाठन गराउँदै आएको छ । पछिल्लो समय यूनिभर्सल एकेडेमी जिल्लाका विद्यार्थी र अभिभावकको पहिलो रोजाइमा पर्न सफल भएको छ ।
