काठमाडौँ । स्थानीय सेवा गठन तथा सञ्चालन ऐन तत्काल जारी गर्नुपर्ने माग गर्दै स्थानीय तहका कर्मचारी आन्दोलीत बनेका छन् ।
सुदूरपश्चिम प्रदेश सरकारले ल्याउन लागेको उक्त ऐन तत्काल जारी गर्नुपर्ने माग राख्दै कर्मचारीहरुले सोमबार मुख्यमन्त्री कार्यालय अगाडि धर्ना दिएका हुन् ।
कर्मचारीहरूले स्थानीय तह कर्मचारी संघर्ष समिति नै बनाएर सोमबारदेखि आन्दोलन सुरु गरेका हुन् । फागु पूर्णिमा पर्व (होली) को सार्वजनिक बिदाका बेला आन्दोलन रोकेका उनीहरूले सोमबारदेखि फेरि आन्दोलन थालेका हुन् ।
‘सुदूरपश्चिम प्रदेश स्थानीय तहको गठन, सञ्चालन र सेवाका सर्तसम्बन्धीमा व्यवस्था गर्न बनेको विधेयक– २०८१’ तत्काल जारी हुनुपर्ने उनीहरूको प्रमुख माग रहेको छ ।
प्रदेशसभाको विधायन तथा प्रदेश मामिला समितिमा विचाराधीन रहेको विद्येयकमा रहेको व्यवस्था हेरफेर हुनुपर्ने माग गर्दै माओवादी र रास्वपा निकट विद्यार्थीहरू आन्दोलित भएका बेला कर्मचारीहरू समेत आन्दोलनमा उत्रिका हुन् ।
