काठमाडौँ । आइतबार बिहानैदेखि काठमाडौँ उपत्यकामा भैरहेको वर्षासँगै प्रतिकूल मौसमका कारण आन्तरिक तथा बाह्य उडान प्रभावित भएका छन् ।
त्रिभुवन अन्तर्राष्ट्रिय विमानस्थलबाट हुने डोमेस्टिक र एउटा अन्तर्राष्ट्रिय उडान प्रभावित भएको हो ।
काठमाडौंबाट लुक्लाका लागि तय भएको एउटा उडान ‘डिले’ भएको छ । यसैगरी रुकुमको एउटा उडान पनि डिले भएको विमानस्थल कार्यालयले जनाएको छ ।
कुवेतबाट आएको जजीरा एयरको जहाज काठमाडौंमा अवतरण हुन नसकेपछि भारतको वनारस ‘डाइभर्ट’ गरिएको छ ।
हाल बागमती, गण्डकी, लुम्बिनी, कर्णाली र सुदूरपश्चिम प्रदेशका एक–दुई स्थानमा चट्याङ्गसहित हल्कादेखि मध्यम वर्षा भइरहेको छ । अहिले काठमाडौंमा पनि छिटपुट वर्षा भइरहेको छ ।
आजको तुलनामा भोलिदेखि पानी पार्ने मौसमी प्रणाली केही कमजोर भए पनि पर्सिसम्म नै सक्रिय रहने अनुमान छ ।
