काठमाडौँ । विद्यालय शिक्षा विधेयक संसदीय समितिबाट पारित भएको छ । शुक्रबार बसेको प्रतिनिधि सभाअन्तर्गत शिक्षा, स्वास्थ्य तथा सूचना प्रविधि समितिको दोस्रो बैठकले विधेयकको प्रतिवेदन पारित गरेको हो ।
कक्षा ८ सम्मको शिक्षालाई आधारभूत शिक्षा मानेर विधेयकको प्रतिवेदनमा सहमति गरिएको समिति सभापति अम्मरबहादुर थापाले जानकारी दिए ।
विधेयकमा बालविकास केन्द्रलाई समायोजन तथा पुनर्वितरण गर्न सक्ने व्यवस्था गरिएको छ । यस्तै, निजी विद्यालयलाई सेवामूलक, लोककल्याणकारी र गैरनाफामूलक बनाएर जाने गरी विधेयकमा सहमति जुटेको छ ।
असार १५ गतेभित्र विद्यालय शिक्षा विधेयक पारित गर्ने भन्ने शिक्षक महासंघसँग भएको सम्झौताअनुसार समितिले सहमति जुटाएको हो ।
