काठमाडौँ । पछिल्लो केही दिन यता काठमाडौं उपत्यकामा खाना पकाउने एलपी ग्याँसको हाहाकार मच्चिएको छ । उपभोक्ताहरु खाना पकाउने ग्याँस नपाउँदा भौतारिन बाध्य भएका छन् ।
उपत्यकामा सबैभन्दा धेरै ग्यासको उपभोक्ता रहेको नेपाल ग्यासका उपभोक्ता खाली सिलिण्डर नै बोकेर उद्योगसम्म पुगेका छन् । उद्योगीले कमिसन वृद्धि गराउने नियोजित योजना बनाएर बजारमा खाना पकाउने ग्यास अभाव गराएका छन् । तर, अहिले ग्यास ढुवानीका लागि प्रयोग भइरहेका भारतीय बुलेटको संख्या घटेको कारण आयातमा समस्या भइरहेको उद्योगीको तर्क छ । नेपालमा ग्यास आयात गर्ने सबै बुलेट भारतीय नै छन् । विगतमा सात सय बुलेटले ढुवानी गरेकामा एक वर्षयता डेढ सय घटेका छन् ।
भारतीय बुलेट व्यवसायीले पछिल्लो समय ढुवानी भाडा वृद्धि गर्न दबाब दिएर ग्यास आपूर्तिमा कडाइ गरेको एक उद्योगीले बताए ।
एलपी ग्यास अभावको हल्ला निराधार भएको नेपाल आयल निगमका प्रबन्ध निर्देशक चण्डिकाप्रसाद भट्टले बताएका छन् । पछिल्लो समय बजारमा एलपी ग्यास अभाव भएको भन्दै फैलिएको हल्लामा विश्वास नगर्न भन्दै उनले बुधबार सामाजिक सञ्जाल फेसबुकमा एक स्टाटस राख्दै उनले सो कुरा पुष्टी गरेका हुन् ।
उनले आपूर्ति सहज र पर्याप्त रहेको स्पष्ट पार्दै दैनिक उपभोगका लागि आवश्यक एलपी ग्यास नियमित रूपमा नेपाल भित्रिरहेको बताए ।
उनका अनुसार नेपालमा प्रतिदिन करिब ९० बुलेट, अर्थात करिब १ लाख १४ हजार सिलिण्डर एलपी ग्यास आवश्यक पर्छ । तर पछिल्ला तीन दिनमा भारतीय आयल कर्पोरेशन ९आइओसी० बाट सोभन्दा बढी मात्रामा ग्यास लोडिङ भएको छ ।
‘लोडिङ विवरणअनुसार शनिबार ११८ बुलेट (करिब १ लाख ४९ हजार ५ सय सिलिण्डर), सोमबार ११५ बुलेट (करिब १ लाख ४५ हजार ७ सय सिलिण्डर) र मंगलबार १३२ बुलेट (करिब १ लाख ६७ हजार ३ सय सिलिण्डर) एलपी ग्यास लोड गरिएको छ,‘ तीमध्ये केही बुलेटहरू बाटोमै रहेका छन् भने थप बुलेटहरू नेपाल प्रवेश गर्ने क्रममा रहेका छन् । तसर्थ, आदारणीय उपभोक्ताज्युहरुलाई अनावश्यक रुपमा ग्यास स्टक नगरिदिनुहुन अनुरोध छ ।’ यस्तै, उनले निर्वाचन अवधिभर पनि हालकै परिमाणमा ग्यास आपूर्ति जारी रहने स्पष्ट पारिएका छन् ।
ग्यास उद्योग संघका अध्यक्ष शिवप्रसाद घिमिरेले ग्यास अभाव भनिएको बजार हल्लामा कुनै सत्यता नरहेको बताए ।
