काठमाडौँ । कोशी प्रदेशका १४ जिल्लामा ४ दिन सार्वजनिक बिदा हुने भएको छ । सरकारले बिहीबार छठ पर्वको बिदा दिएको छ । तर, कोशी प्रदेश सरकारले बिहीबार र शुक्रबार गरी २ दिन बिदाको घोषणा गरेसँगै १४ जिल्लामा बिहीबारदेखि आइतबारसम्म गरी ४ दिन सार्वजनिक बिदा परेको हो ।
तिहारको ५ दिन लामो बिदा सोमबार मात्रै सकिएको छ। मंगलबारदेखि सरकारी कार्यालयहरू खुलेका छन् । मंगलबार र बुधबार २ दिन कार्यालय खुल्ने छन् । सार्वजनिक बिदाका कारण कोशी प्रदेशमा बिहीबारदेखि आइतबारसम्म बन्द रहने छन् ।
छठका लागि संघीय सरकारले बिहीबार बिदा दिएको छ। कोशी प्रदेश सरकारले शुक्रबार प्रदेशका १४ वटै जिल्लामा छठ समापनको बिदा दिएको हो । बिहीबार र शुक्रबार छठका लागि बिदा र शनिबार सार्वजनिक बिदा परेका कारण उक्त प्रदेशमा ४ दिन बिदा परेको हो । हालसम्म कोशी प्रदेश बाहेक अन्य प्रदेशले शुक्रबार सार्वजनिक बिदाको घोषणा भने गरेका छैनन् ।
सूर्यदेवको उपासना गर्दै ४ दिनसम्म मनाइने छठ शुक्रबार उदाउँदो सूर्यलाई अर्घ दिएर समापन गरिने छ ।
मंगलबारदेखि छठ सुरु भएको छ । पहिलो दिन नहाय खाय मनाइएको छ । दोस्रो दिन अर्थात बुधबार खरना पर्व मनाइन्छ । तेस्रो दिन बिहीबार छठको मुख्य दिन हो । तेस्रो दिन अस्ताउँदो सूर्यलाई जलाशय किनारबाट अर्घ दिने परम्परा छ। अन्तिम दिन शुक्रबार बिहान उदाउँदो सूर्यलाई अर्घ दिएपछि छठ पर्वको विधिवत् रूपमा समापन हुने छ ।
