काठमाडौँ । सेयर बजारमा उच्च अंकको सुधार आएको छ । साताको कारोबारको चौथो दिन बुधबार सेयर बजार सूचक नेपाल स्टक एक्सचेञ्ज (नेप्से) ६१.२६ अंक अर्थात् २.३४ प्रतिशतले बढेर २६७२.७० विन्दुमा रोकिएको छ ।
अघिल्लो कारोबार दिन मंगलबार नेप्से १.०३ अंकले बढेको थियो भने त्यसअघिका पाँच कारोबार दिन लगातार घटेको थियो ।
बुधबार सूचकसँगै कारोबारमा पनि सुधार आएको छ । आज नेप्सेमा कुल १० अर्ब ५१ करोड रुपैयाँ बराबरको कारोबार भएको छ । अघिल्लो दिन मंगलबार भने नेप्सेमा कुल ८ अर्ब ५६ करोडको कारोबार भएको थियो ।
बुधबार कारोबारमा आएकामध्ये २२७ कम्पनीको सेयर मूल्य बढ्दा १८ कम्पनीको मात्रै घटेको छ । यस्तै, एक कम्पनीको सेयर मूल्य भने स्थिर छ ।
