![पतञ्जली जग्गा प्रकरण: ९३ जना प्रतिवादी, माधव नेपालविरुद्ध साढे १८ करोड बिगो दाबी[पूर्णपाठ]](https://cnnkhabar.com/media-file/images/2025/06/1749113135-5U32F.jpg)
काठमाडौं । काभ्रेको बनेपास्थित पतञ्जली योगपीठ तथा आयूर्वेद कम्पनी सञ्चालनका लागि हदबन्दीभन्दा बढी जग्गा खरिद प्रकरणबारे ९३ जनालाई प्रतिवादी बनाएर विशेष अदालतमा मुद्दा दायर भएको छ । अख्तियार दुरुपयोग अनुसन्धान आयोगले आज पूर्वप्रधानमन्त्री एवं एकीकृत समाजवादीका अध्यक्ष माधवकुमार नेपालसहित ९३ जनालाई प्रतिवादी बनाइएको छ । ०६६ सालमा नेपाल प्रधानमन्त्री भएको बखतमा पतञ्जलीका नाममा हदबन्दीभन्दा बढी जग्गा साटफेर गर्न दिने निर्णय भएको थियो ।
अख्तियारले नेपालसहित तत्कालीन भुमीसुधारमन्त्री, भुमीसुधार सचिव, मुख्यसचिवसहित ९३ जनाविरुद्ध मुद्दा दायर गरेको हो ।नेपालविरुद्ध १८ करोड ५८ लाख ५० हजार रुपैयाँ विगो जरिवाना र सजाय मागदाबी सहित भ्रष्टाचार मुद्दा दायर भएको छ । अन्यको हकमा भने विगो रकम फरक फरक रहेको अख्तियारले जनाएको छ ।
मन्त्रिपरिषद्को निर्णयविरुद्ध यो नै पहिलोपटक मुद्दा दायर भएको हो । साथै अहिलेसम्म कुनै पनि पूर्वप्रधानमन्त्रीविरुद्ध मुद्दा दायर नभएकोमा अख्तियारले पहिलोपटक पूर्वप्रधानमन्त्रीविरुद्ध मुद्दा दायर गरेको हो ।
‘भ्रष्टाचार निवारण ऐन, २०५८ को दफा १७ ले निर्देश गरे बमोजिम बिगो रु. १८,५८,५०,०००० कायम गरी सोही ऐनको दफा ३ को उपदफा (१) को देहाय (झ) तथा भ्रष्टाचार निवारण ऐन, २०५९ (पहिलो संशोधनसहित) को दफा ३ को उपदफा (१) को देहाय (ज) बमोजिम कैद र सोही ऐनको दफा ३ को उपदफा (१) बमोजिम बिगो बमोजिम जरिवाना गरी सोही ऐनको दफा १७ बमोजिम बिगो असुल उपर हुने र साथै सोही ऐनको दफा २४ बमोजिम थप सजाय हुन मागदाबी दिइएको छ ,’ आरोपपत्रमा भनिएको छ ।
हेर्नुहोस् पूर्णपाठ :
