काठमाडौं । नेकपा (माओवादी केन्द्र) का नेता अग्निप्रसाद सापकोटाले जेनजी पुस्ता र आफ्नो पार्टीबिच साझा धारणा रहेको दाबी गरेका छन् ।
आइतबार पार्टी मुख्यालय पेरिसडाँडामा सञ्चारकर्मीहरुले राखेका जिज्ञासाको जवाफ दिँदै सापकोटाले जेनजीले उठाएका मागहरू आफूहरूले पहिले नै उठाइरहेको विषय भएको उल्लेख गरे । उनले जेनजी पुस्तासँग माओवादी केन्द्रको सोच, विचार र धारणा समान रहेको बताए ।
उनका अनुसार जेनजी पुस्ताले उठाएका मागहरू जायज छन् र ती मागप्रति माओवादी केन्द्र सकारात्मक रहँदै आएको छ । ‘हामी जेनजीले उठाएका मागहरूमा सकारात्मक मात्रै होइन, ती त हामीले पहिलादेखि नै उठाएका मागहरू हुन्, ‘सापकोटाले भने, ‘हाम्रो र उनीहरूको सोच, विचार र धारणा साझा छ, अहिले त्यसमा एकरूपता देखिँदैछ ।’
सापकोटाले जेनजी पुस्ताका मागहरूबारे पार्टीले राष्ट्रपतिसँग र प्रधानमन्त्रीसँग भएको भेटमा पनि सकारात्मक दृष्टिकोण प्रस्तुत गरेको जानकारी दिए ।
यसै अवसरमा उनले नेत्रविक्रम चन्द ‘विप्लव’ नेतृत्वको नेकपाले आगामी निर्वाचनमा भाग लिनका लागि निर्वाचन आयोगमा दल दर्ता गर्ने तयारीलाई पनि सकारात्मक रूपमा लिएको बताए ।
