काठमाडौँ। नेकपा (एमाले) को वैचारिक विरासतलाई अगाडि बढाउने संकल्पका साथ पार्टी निकट जेनजी (Gen Z) पुस्ताका युवा विद्यार्थीहरू संगठित भएका छन्। जननेता मदन भण्डारीद्वारा प्रतिपादित 'जनताको बहुदलीय जनवाद' (जबज) को प्रगतिशील एवं लोकतान्त्रिक विचारधारालाई आत्मसात गर्ने उद्देश्यसहित 'मदन भण्डारी विचारधारा विद्यार्थी फोरम' को औपचारिक कमिटी गठन गरिएको हो।
जेनजी पुस्ताका यी युवाहरूले जबजको सान्दर्भिकतालाई आजको राष्ट्रिय तथा अन्तर्राष्ट्रिय परिवेशमा विद्यार्थीमाझ स्थापित गर्दै वैचारिक बहसलाई तीव्रता दिने लक्ष्य लिएका छन्।
नवगठित फोरममा कूल १९० जना युवा विद्यार्थी समेटिएका छन्, जसमा १८६ जना सदस्यहरू छन्। फोरमको नेतृत्व निम्न पदाधिकारीहरूले सम्हाल्ने भएका छन्:
| पद | नाम |
| संयोजक | अधिवक्ता समिर रिजाल |
| सह-संयोजक | विवेक तमु |
| सह-संयोजक | अभी विश्वकर्मा |
| प्रवक्ता | मनिषा पौडेल |
फोरमको मुख्य कार्यसूची जबजका सिद्धान्तहरूमा आधारित रहेर विश्वविद्यालय तथा क्याम्पसहरूमा अध्ययन, अनुसन्धान र रचनात्मक कार्यक्रमहरू सञ्चालन गर्नु हो। विशेषगरी लोकतन्त्रको सुदृढीकरण, आर्थिक समृद्धि र सांस्कृतिक रूपान्तरण माथि नयाँ पुस्ताको दृष्टिकोणबाट विमर्श चलाउने फोरमको लक्ष्य रहेको छ।
कार्यक्रमहरू मार्फत जेनजी पुस्तालाई नेपालको सामाजिक, आर्थिक र राजनीतिक रूपान्तरणमा सक्रिय र अर्थपूर्ण भूमिका खेल्न सक्ने गरी तयार गर्ने फोरमले जनाएको छ। यस कमिटीको विशेष कार्यशाला यसै मङ्सिर महिनाभित्र काठमाडौँमा गर्ने तयारी रहेको जानकारी फोरमले दिएको छ।
