काठमाडौं । आगामी प्रतिनिधि सभाको निर्वाचनलाई लक्षित गर्दै निर्वाचन आयोगले फागुनको पहिलो सातादेखि मतदाता शिक्षा विशेष कार्यक्रम सञ्चालन गर्ने भएको छ।
निर्वाचन आयोगका प्रवक्ता नारायणप्रसाद भट्टराईका अनुसार फागुन ३ देखि १७ गतेसम्म देशभर मतदाता शिक्षा कार्यक्रम सञ्चालन हुनेछ। सो कार्यक्रम निर्वाचन शिक्षा तथा मतदाता शिक्षा निर्देशिका, २०७८ बमोजिम स्वीकृत भइसकेको उनले जानकारी दिए।
कार्यक्रमअन्तर्गत देशभरका ७५३ स्थानीय तहका ६ हजार ७४३ वडामा एक–एक जना मतदाता शिक्षा स्वयंसेवक परिचालन गरिनेछ। स्वयंसेवकहरूले मतदाताको बस्ती र घरदैलोमा पुगेर नमूना मतपत्रको प्रयोगमार्फत मतदान प्रक्रिया, मत हाल्ने तरिका र निर्वाचनको महत्त्वबारे जानकारी गराउनेछन्।
आयोगले हरेक निर्वाचनमा स्थानीय तहमा तोक्ने सम्पर्क व्यक्तिलाई यसपटक पनि मतदाता शिक्षा कार्यक्रमको अनुगमनकर्ताको जिम्मेवारी दिएको छ।
मतदाता शिक्षा अनुगमनकर्ता तथा स्वयंसेवकहरूका लागि जिल्लास्तरीय र स्थानीय तहस्तरीय तालिम तथा अभिमुखीकरण कार्यक्रम माघ महिनाको अन्त्यसम्म सम्पन्न गरिने आयोगले जनाएको छ।
