काठमाडौँ । सरकारले इजाजत नलिई सञ्चालन भइरहेका पूर्वाधारयुक्त साहसिक तथा मनोरञ्जनात्मक पर्यटकीय खेलहरूविरुद्ध कडा निगरानी सुरु गरेको छ ।
पर्यटन ऐन २०३५ तथा पर्यटन नियमावली २०८१ अनुसार अनुमति नलिई सञ्चालन भएका खेल तथा गतिविधिले पर्यटकको सुरक्षामा गम्भीर जोखिम सिर्जना गरेको भन्दै पर्यटन विभागले सूचना जारी गरेको हो ।
विभागका अनुसार जिप फ्लायर, जेट स्की, मोटरबोट लगायतका साहसिक तथा मनोरञ्जनात्मक खेलहरू कानुनी प्रक्रिया पूरा नगरी सञ्चालन भइरहेको पाइएको छ । यस्ता गतिविधिले दुर्घटनाको जोखिम बढाउनुका साथै पर्यटन क्षेत्रको विश्वसनीयतामै असर पार्ने विभागको भनाइ छ ।
विभागले अनुमति नलिई सञ्चालन भएका खेल तथा गतिविधिबारे सम्बन्धित संस्था, सञ्चालक वा व्यक्तिको नाम, ठेगाना र विवरण उपलब्ध गराउन सर्वसाधारणलाई समेत आग्रह गरेको छ ।
सूचनामा यस्ता गतिविधिमाथि कानुनअनुसार कारबाही गरिने चेतावनी दिँदै सुरक्षित र व्यवस्थित पर्यटन प्रवर्द्धनमा सहयोग गर्न सबै सरोकारवालालाई अपिल गरिएको छ ।
