काठमाडौं । राष्ट्रिय स्वतन्त्र पार्टी (रास्वपा) ले बालुवाटारमा विरोध प्रदर्शन गरेको छ । सहकारी ठगी प्रकरणमा सभापति रवि लामिछाने पक्राउ परेपछि रास्वपाले विरोध प्रदर्शन गर्दै आएको छ ।
रास्वपाले प्रधानमन्त्री निवासनजिकै प्रदर्शन गर्दा रास्वपाका नेता–कार्यकर्ता र प्रहरीबीच घम्साघम्सी नै चलेको छ । प्रहरीले धरपकड शुरु गरेपछि केहीबेर प्रहरी र प्रदर्शनकारीबीच घम्साघम्सी नै चलेको थियो ।
मंगलबार बालुवाटारमा आयोजित विरोध प्रदर्शनमा प्रहरीले रास्वपाका प्रतिनिधिसभा सदस्य अशोक चौधरीसहित १७ जना कार्यकर्तालाई पक्राउ गरेको छ ।
प्रहरीले सांसद चौधरीसहित रास्वपाका काठमाडौं जिल्ला सभापति प्रदीप विष्ट, ललितपुर सभापति बुद्धरत्न महर्जन, वीरेन्द्र श्रेष्ठ, सुरेश पोख्रेल, ध्रुब ढकाल, नवराज भण्डारी, प्रकाश लामिछाने, रक्षा रायमाझी, साहिल पृयास र सबि खड्कालगायतलाई पक्राउ गरेको छ ।
रास्वपाका कार्यवाहक महामन्त्री कवीन्द्र बुर्लाकोटीले वक्तव्य जारी गरी शान्तिपूर्ण रूपमा उभिएर छलफल गर्दै गर्दा प्रहरीले दमन गरेको बताउँदै भर्त्सना गरेका छन् ।
