काठमाडौं । डा. निकोलस भुसालले रवि लामिछानेको हिरासतभित्रको फोटो खिचेको स्विकार्दै माफी मागेका छन्। काठमाडौंमा, रास्वपा सभापति लामिछानेका समर्थक भुसालले सामाजिक सञ्जालमा भाइरल भएको उक्त फोटो आफूले खिचेको पुष्टि गरेका हुन्। उनले यस काममा कुनै खराब नियत नभएको तर गल्ती भएको महसुस गर्दै माफी मागेका छन्।
भुसालले दुई दिनअघि फेसबुकमा उक्त फोटो सार्वजनिक गरे पनि पछि हटाएका थिए। बुधवार, रास्वपाका सहकोषाध्यक्ष दीपक बोहराले फोटो पुनः पोस्ट गरेपछि यो भाइरल भएको हो।
रविका समर्थकहरूले प्रहरीद्वारा हिरासतभित्रको फोटो सार्वजनिक भएको भन्दै आलोचना गरे। तर भुसालले भने, ‘यो फोटो प्रहरीले सार्वजनिक गरेको होइन। यो मेरो गल्ती हो। मैले यो फोटो बाहिर ल्याएको हुँ। यसका लागि नेपाल प्रहरी र नेपाल सरकारसँग माफी माग्न चाहन्छु।’
उनका अनुसार, रविको स्वास्थ्य जाँच गर्न हिरासत गएका बेला प्रहरीकै उपस्थितिमा उनले फोटो खिचेका थिए। उनले फोटो खिच्नुको उद्देश्य रविको स्वास्थ्य ठिक रहेको प्रमाणित गर्नु रहेको बताएका छन्।
उनले भने, ‘फोटो खिच्दा न भाइरल गराउने, न कसैलाई दोष लगाउने, न त कसैलाई नराम्रो देखाउने सोच थियो। केवल हिरासतको अवस्था कस्तो छ भन्ने देखाउन र वास्तविकता बाहिर ल्याउन मात्र खोजेको थिएँ।’
