काठमाडौँ । तनहुँमा वडाअध्यक्षले वडा सचिवलाई कुटपिट गरेको पाइएको छ । तनहुँको बन्दिपुर गाउँपालिका वडा नम्बर ६ का वडाअध्यक्ष बल बहादुर गुुरुङले वडामा कार्यरत वडा सचिव नविन भुसालमाथि कुटपिट गरेका हुन् ।
कुटपिटबाट गम्भीर घाइते भएका वडा सचिवको चितवन मेडिकल कलेज भरतपुरमा उपचार भइरहेको छ । घटना लगतै उनको बन्दिपुर अस्पतालमा उपचार गरिएको थियो । तर, गम्भीर चोट लागेपछि बन्दिपुर अस्पतालले उनको चितवन मेडिकल कलेजमा रिफर गरेको हो ।
सचिव भुसालको घाँटीमा गहिरो चोट भएको चिकित्सकले बताएका छन् ।
कुटपिट गर्ने वडाध्यक्ष गुरुङलाई प्रहरीले नियन्त्रण लिई थप अनुसन्धान गरिरहेको प्रहरीले बताएको छ । पीडित पक्ष तथा बन्दीपुर गाउँपालिकाका कर्मचारीहरूले घटनाको सत्य तथ्य छानबिन गरी दोषीमाथि कारबाही गर्नुपर्ने माग सहित आकस्मिक सेवा बाहेक सबै कामकाज ठप्प पारेको गाउँपालिका कर्मचारीहरूले जारी गरेको विज्ञप्तिमा उल्लेख छ ।
उक्त घटनापछि नेपाल निजामति कर्मचारी संगठन, नेपाल निजामती कर्मचारी युनियन र राष्ट्रिय कर्मचारी संगठन (निजामती) ले विज्ञप्ती जारै गर्दै आपत्ति जनाएका छन् ।
