काठमाडौं । नवनियुक्त प्रहरी महानिरीक्षक (आईजी) दीपक थापाले नेपाल प्रहरीको सक्षमता अभिवृद्धि, सुशासन प्रवर्द्धन र सुधारका लागि दृढ प्रतिबद्धता व्यक्त गरेका छन्।
गृहमन्त्रालयमा आयोजित दर्ज्यानी चिह्न प्रदान समारोहमा आईजी थापाले प्रहरी संगठनलाई अझ प्रभावकारी, निष्पक्ष र लोककल्याणकारी बनाउन पहल गर्ने बताए । प्रहरी समाजकै उपज हो। समाजका राम्रा(नराम्रा पक्षको प्रतिबिम्ब प्रहरीमा देखिनु स्वाभाविक हो । सुधार आवश्यक छ, र यसको लागि अब साइत कुरेर बस्ने समय छैन, उनले भने।
उनले सुधारको सुरुवात नेतृत्वबाटै हुने बताउँदै प्रहरी संगठनभित्र पारदर्शिता, निष्पक्षता, कार्यकुशलता, र वृत्ति विकासको सुनिश्चितता गरिने उल्लेख गरे। पद र जिम्मेवारी निष्पक्ष ढंगले प्रदान गरिनेछ। प्रहरी कर्मचारीले कुनै पीडा वा अन्याय महसुस गर्नुपर्ने स्थिति आउन दिइने छैन, आईजी थापाले प्रतिबद्धता जनाए।
आईजी थापाले प्रहरीको व्यावसायिकता र सक्षमता अभिवृद्धि गर्दै नागरिक सेवा प्रवाहलाई प्रभावकारी बनाउने लक्ष्य लिएको बताए। हाम्रो प्राथमिकता कानूनी शासन, मानव अधिकारको प्रत्याभूति, सामाजिक न्याय र सद्भाव कायम गर्ने हो। प्रहरी जनताको सेवक हो, राज्यको दह्रो प्रतिनिधि हो, त्यसैले हामी नागरिकको सुरक्षा र हितका लागि निरन्तर क्रियाशील रहनेछौं, उनले भने।
प्रहरी संगठनलाई आधुनिक प्रविधिसँग समायोजन गर्दै जनशक्तिको क्षमता अभिवृद्धि, स्रोतसाधनको विस्तार र समन्वयात्मक सुधारमार्फत प्रहरीलाई अझ प्रभावकारी बनाउने योजना रहेको उनले स्पष्ट पारे। गृहमन्त्रालयको सहयोग र अभिभावकत्व निरन्तर रहिरहने विश्वास व्यक्त गर्दै, आईजी थापाले नेपाल प्रहरीलाई नागरिकमैत्री, अनुशासित र विश्वसनीय संस्थाका रूपमा स्थापित गर्न लागिपर्ने बताए ।
