काठमाडौँ । अख्तियारमा परेका उजुरी फर्छ्यौट गर्ने जिम्मेवारीमा रहेका कर्मचारी घुस रकमसहित पक्राउ परेका छन् ।
उक्त जिम्मेवारीमा रहेका पोखरा महानगरपालिकाका शाखा अधिकृत कपिल गिरी २५ हजार रुपैयाँ घुस रकमसहित पक्राउ परेका हुन् ।
बिहीबार अख्तियार दुरुपयोग अनुसन्धान आयोग पोखरा कार्यालयले गिरीलाई न्युरोडस्थित महानगरपालिका कार्यालय अगाडि सेवाग्राहीसँग रकम लिँदै गरेको अवस्थँमा नियन्त्रणमा लिएको हो ।
उनी महानगरपालिकाको उजुरी फर्छ्यौट तथा समन्वय शाखाको संयोजकको जिम्मेवारीमा थिए । महानगरका सम्बन्धमा अख्तियारमा परेका उजुरीका विषयमा वडा, शाखाबाट राय प्रतिक्रिया संकलन गरी जवाफ पठाउने काम उनैले गर्थे ।
आयोगको पोखरा कार्यालयका सूचना अधिकारी राकेश पाण्डेका अनुसार गिरीले सेवाग्राहीका बारेमा अख्तियारमा उजुरी परेको र त्यसलाई मिलाउन एक लाख रुपैयाँ दिनुपर्ने भन्दै रकम माग गरेका थिए ।
उक्त रकममध्ये २५ हजार रुपैयाँ लिदैगर्दा आयोगका कर्मचारीले उनीलाई पक्राउ गरेको हो ।
