काठमाडौँ । अख्तियार दुरुपयोग अनुसन्धान आयोगले मधेश प्रदेशका प्रदेशसभा सदस्य सरोक कुमार सिंह सहित १६ जना विरुद्ध भ्रष्टाचार मुद्दा दायर गरेको छ । आयोगले बिहीबार विशेष अदालत काठमाडौँमा उनीहरु विरुद्ध भ्रष्टाचार मुद्धा दायर गरेको हो ।
प्रदेश सभा निर्वाचन क्षेत्र विकास कार्यक्रम अन्तरगत विनियोजित बजेट मार्फत सञ्चालित भएका योजनाहरुबाट उनले घुस लिएको आरोप लगाईएको छ । विभिन्न उपभोक्ता समितिमार्फत महोत्तरी जिल्लाका ३ पालिकामा सञ्चालित योजनाबाट उनले आफ्ना स्वीकय सचिवमार्फत घुस लिएर आफ्नो र श्रीमतिको संयुक्त रुपमा सञ्चालित बैंकमा रकम जम्मा गर्ने गरेको पाइएको अख्तियारले जारी गरेको विज्ञप्तीमा उल्लेख छ ।
यस्तै, उनले आर्थिक वर्ष २०७८/०७९ मा उक्त कार्यक्रम मार्फत महोत्तरीका रामगोपालपुर, मनराशिसवा गाउँपालिका र सम्सी गाउँपालिकाका विभिन्न वडाहरुमा विकास योजनाहरु सञ्चालन गर्नका लागि गठित भएका उपभोक्ता समितिहरुका बैंक खातामा रहेको १ करोड ३६ लाख २७ हजार ४८१ रुपैयाँ अनियमितता गरेको उल्लेख छ । उक्त रकममध्ये उनले श्रीमति र आफ्नो संयुक्त रुपमा सञ्चालित लक्ष्मी सनराईज बैंकमा ३८ लाख ५० हजार ३१९ रुपैयाँ घुस लिएर जम्मा गरेको पुष्टि भएको विज्ञप्तीमा उल्लेख छ ।
