काठमाडौँ । बाराको सिमरा क्षेत्रमा कर्फ्यू आदेश जारी गरिएको छ । सिमरा विमानस्थल आसपास जेनजी युवाहरूको प्रदर्शन र प्रहरीबीच तनाव उत्पन्न भएपछि विमानस्थल आसपासको ५०० मिटर क्षेत्रमा जिल्ला प्रशासन कार्यालयले कर्फ्यू लगाएको हो ।
कार्यालयका प्रमुख जिल्ला अधिकारी धर्मेन्द्र कुमार मिश्रद्वारा जारी सूचना अनुसार, आज दिउँसो १२:३० बजे देखि बेलुका ८:०० बजेसम्म स्थानीय प्रशासन ऐन, २०२८ को दफा ६ (क) र (ख) बमोजिम कर्फ्यू लागू गरिएको हो । कर्फ्यु अवधिभर आवत–जावत, भेला, जुलुस, प्रदर्शन, सभा वा बैठक गर्न पूर्ण रूपमा निषेध गरेको छ।
तर, अत्यावश्यक सेवामा भने कर्फ्यू आदेश लागू नहुने प्रशासनले स्पष्ट पारेको छ । दमकल, एम्बुलेन्स, शववाहन, स्वास्थ्यकर्मीका सवारी साधन, सञ्चारकर्मी, पर्यटक सवारी साधन, मानव अधिकारकर्मी तथा कूटनीतिक नियोगका सवारी साधनहरू कर्फ्यूबाट मुक्त रहनेछन् ।
यसअघि एमाले नेता महेश बस्नेत आउने भएपछि बाराको सिमरामा प्रहरी र जेनजी युवाबीच झडप भएको थियो । त्यस क्रममा प्रहरी र जेनजीबीच झडप भएको हो । झडपका कारण त्यहाँको अवस्था अहिले तनावग्रस्त बनेको छ ।
युवा जनजागरण अभियान कार्यक्रमअन्तर्गत आज बाराको परवानीपुरमा एमालेका युवा संगठन युवा संघले मधेश प्रदेश स्तरीय कार्यक्रम आयोजन गरेको छ ।
