काठमाडौं । स्वतन्त्र सांसद डा. अमरेश सिंहले काठमाडौं महानगरपालिकाका मेयर बालेन शाह तानाशाही भएको आरोप लगाएका छन् ।
सोमबार बसेको प्रतिनिधिसभा बैठकको आकस्मिक समयमा उनले मेयर बालेन तानाशाही भएको आरोप लगाएका हुन् । सिंहले कवाड व्यवसायीमाथि डोजर चलाएर काठमाडौंका मेयरले हिटलरको शैली अपनाएको आरोप लगाए ।
उनले काठमाडौं महानगरका मेयर बालेनलाई कवाडी गोदाम मात्र नभएर सिंहदरबार भत्काउन चुनौती दिए ।
'बालेनलाई च्यालेन्ज गर्छु हिम्मत छ भने संसद भवन भत्काएर देखाऊ, हिम्मत छ भने सिंहदरबार भत्काएर देखाऊ, हिम्मत छ भने सर्वोच्च अदालत, बालुवाटार र शीतल निवास भत्काएर देखाऊ । नाजीवादी शैली काठमाडौंको मेयरको चल्दैन ।'
२७ माघमा काठमाडौंको टेकुमा रहेको एक कबाड गोदाममा काठमाडौं महानगरपालिकाले डोजर चलाएको थियो । सो क्रममा महानगर प्रहरीको टोली र मजदुरहरूबीच झडप भएको थियो । झडपमा ३ जना घाइते भएका थिए ।
