काठमाडौं । भुक्तानी सेवा सञ्चालक कम्पनी इ–सेवाको पछिल्लो समय गुणस्तर खस्किँदै गएको छ । केही दिनयता बेलाबेला समस्या देखिएका कारण सेवाग्राहीहरु हैरान भएका छन् ।
मंगलबार साँझ पनि इसेवामा समस्या आएको थियो । इसेवामा एप नै नखुल्ने, भुक्तानी नहुने, भुक्तानी प्राप्त गर्न नसकिनेजस्ता समस्या देखिने गरेको छ । यस समस्यालाई लिएर प्रयोगकर्ताहरूले गुनासोसमेत गर्ने गरेका छन् ।
पछिल्लो एक सातादेखि इसेवामा यस्तो समस्या बढेको छ । इसेवाको मुख्य कम्पनी एफवानसफ्ट ग्रुपका निर्देशक सुवास शर्माले भने ‘लोड बढ्दा’ सेवा प्रवाहमा समस्या भइरहेको बताए ।
यो समस्या समाधानका लागि प्राविधिक टिमले काम गरिरहेको उनले बताए । प्लेस्टोरमा मात्रै एक करोडभन्दा बढी डाउनलोड्स रहेको इसेवा नेपालको सबैभन्दा पुरानो र प्रमुख डिजिटल वालेट हो ।
