काठमाडौं । ताप्लेजुङको पाथीभरा क्षेत्रमा बिहीबार भएको झडपपछि यातायात व्यवसायीहरूले आज राति १२ बजेदेखि सम्पूर्ण यातायात बन्द गर्ने घोषणा गरेका छन्। पाथीभरा यातायात सेवा प्रालिले विज्ञप्ति जारी गर्दै यात्रु र सवारी चालकहरूको सुरक्षाको लागि यस्तो निर्णय गरिएको जनाएको छ।
विज्ञप्तिमा भनिएको छ कि फागुन ८ गते काफ्ले पाटीतर्फ स्वास्थ्यकर्मी लिएर जाँदै गरेको मे १ ज २५७९ नम्बरको गाडीमा केबलकार विरोधी समूहले तोडफोड गरेको र चालक राजकुमार पौडेललाई मरणासन्न अवस्थामा कुटपिट गरेको घटनाले यातायात व्यवसायीहरूलाई गम्भीर असर पुर्याएको छ। यो घटनाप्रति सवारी चालक मजदुर संघले घोर भर्त्सना गर्दै कानुनी कारबाहीको माग गरेको छ।
यातायात व्यवसायीहरूले चर्को भन्सार शुल्क र बैंक ऋणको बोझमा काम गर्दै आएका बेला यस्ता घटनाले उनीहरूको जीवनयापनमा ठूलो क्षति पुर्याएको बताएका छन्। त्यस्तै, व्यवसायीहरूले एम्बुलेन्स, दमकल, दूध र सब्जीबोक्ने सवारी साधनबाहेक अन्य कुनै पनि सवारी साधन नचलाउने चेतावनी दिएका छन्।
यसैबीच, पाथीभरा क्षेत्रको डडेले भन्ने स्थानमा केबलकारको निर्माण बारेको विवादले हिंसात्मक झडपको रूप लिएको छ। झडपमा नेपाल प्रहरी र सशस्त्र प्रहरीका १२ जना, र आन्दोलनकारी तर्फ एक जना घाइते भएका छन्। आन्दोलनकारीहरूले सुरक्षा बलका सामग्रीमा पनि क्षति पुर्याएका छन्।
घटनाको समायोजन गर्न प्रशासनले अश्रुग्यास प्रहार गरेको र सुरक्षा कडा पारिएको छ। अब घटनामा संलग्न व्यक्तिहरूलाई कानुनी कारबाही गर्न तयारी भइरहेको प्रशासनको भनाइ छ।
