काठमाडौँ । बजेटमा टेक एण्ड पे को व्यवस्था राखेको भन्दै उर्जा उत्पादकहरुले विरोध जनाएका छन् । बिहीबार राजधानीमा स्वतन्त्र ऊर्जा उत्पादकहरूको संस्था, नेपाल (इप्पान) ले पत्रकार सम्मेलन गर्दै उक्त नितिले उर्जा उत्पादकलाई समस्या परेको बताएको हो ।
उक्त पत्रकार सम्मेलनमा उपस्थित उर्जा उत्पादकले इप्पानले राखेको माग सम्बोधन नभए निजी क्षेत्रले उत्पादन गरिरहेको विद्युत् उत्पादन बन्द गर्नेसम्मका चेतवानी दिएका हुन् ।
कार्यक्रममा बोल्दै इप्पानका अध्यक्ष गणेश कार्कीले राज्यले ऊर्जा उत्पादकको कुरा नसुने विद्युत् उत्पादन नै बन्द गर्ने बताए । ‘हामीले राख्ने ठाउँसबैमा आफ्नो मागहरु राखिसकेका छाैँ । अर्थमन्त्री, उर्जामन्त्री, उर्जा सचिव र नेपाल विद्युत प्राधिकरणका कार्यकारी प्रमुखले बजेटमा सो कुरा कसरी आयो भन्नेमा अन्योल व्यक्ति गर्नुभएको छ । आधिकारीक निकायबाट सो प्रस्ताव नगएपनि पावरको आधारमा मौखिक प्रस्ताव गएको भन्ने पाइयो’, उनले भने ।
उनले नेपालका विभिन्न क्षेत्रमा लगानी गर्ने तयारीमा रहेका विदेश लगानी कर्ताहरुले नेपालमा के भएको हो भनेर सोध्न थालेको बताए ।
ऊर्जा उत्पादक आत्माराम घिमिरे निजी क्षेत्रको समस्या समाधान गर्नका लागि उत्पादकहरुले विद्युत् उत्पादन नै रोक्नु पर्ने बताए । उनले भने, ‘राज्यले हाम्रो कुरा सजिलै सुन्दैन भने हामी विद्युत् उत्पादन बन्द गर्न तर्फ लाग्नु पर्छ । पहिलो लगानी गर भन्ने अहिले उत्पादन भएपछि विद्युत् किन्दिन भन्न मिल्छ । त्यसैले निजी क्षेत्रले उत्पादन नै बन्द गरौँ ।’
अर्का ऊर्जा उत्पादक विनोद देवकोटाले उर्जा मन्त्रीले आफूलाई उक्त प्रस्ताव कसरी गयो भनेर भन्न नमिल्ने बताए । ‘बजेटमा टेक एण्ड पे को व्यवस्था कसरी आयो । यसको जिम्मा स्वय मन्त्रीज्यूले लिनुपर्छ । निजी क्षेत्रका उर्जा उत्पादनको आन्दोलको नेतृत्व उहाँले लिनुपर्छ, नभए पदबाट राजीनामा दिनुपर्याे’, उनले भने ।
इप्पानका उपमहासचिव प्रकाश दुलाल नयाँ बजेटमा टेक एण्ड पे योजनाबद्ध रुपमा आएको बताए । उनले भने, ‘हाम्रा केही साथीहरुलाई बजेटमा समावेस हुनुभन्दा पहिले सोधेको थियो । ती साथिले कस्तो सुझाव दिएको हो ? अब राज्यले ऊर्जा क्षेत्र सिद्ध्याउन लागेको छ । हामीले अहिले प्रेसर दिनु प¥यो । विद्युत् विधेयक पास हुनसाथ ऊर्जा क्षेत्र आफै सकिन्छ । त्यसका लागि हामीले अहिलेले सोच्ने बेला आएको छ ।’
नेपाल विद्युत् प्राधिकरणका अनुसार प्राधिकरणले अहिले निजी क्षेत्रसँग करिब १ हजार मेगावाट विद्युत् किनी रहेको छ ।
