काठमाडौं । नेपाल समाजवादी पार्टी(नेसपा)ले बृहत् शान्ति सम्झौता, संविधानको भावना तथा राष्ट्रिय सहमतिका आधारमा द्वन्द्वपीडितका मागहरू पुरा गर्न आग्रह गरेको छ । नेसपाका अध्यक्ष डा.बाबुराम भट्टराई नेतृत्वको प्रतिनिधिमण्डलले शुक्रबार प्रधानमन्त्रीको कार्यालय सिंहदरबारमा प्रधानमन्त्री केपी शर्मा ओलीलाई ज्ञापनपत्र बुझाउँदै सो आग्रह गरेको हो ।
ज्ञापनपत्रमा सत्तानिरुपण तथा मेलमिलाप आयोग र बेपत्ता पारिएका व्यक्तिहरूको छानबिन आयोग यथाशीघ्र गठन गर्नुपर्ने, सशस्त्र द्वन्द्वका पीडितका प्रतिनिधिलाई आयोगमा समावेश गराउनुपर्ने, ऐनमा पीडितहरूले पाउने परिपूरण स्पष्ट पार्नुपर्ने लगायत १८ बुँदे माग रहेका छन् । साथै प्रमुख राजनीतिक दलहरूलाई सहमतिमा ल्याएर सङ्क्रमणकालीन विधेयक पारित गरेकोमा सरकारलाई धन्यवाद दिइएको छ ।
