काठमाडौँ । राष्ट्रिय स्वतन्त्र पार्टी (रास्वपा) का मधेस प्रदेशकी संस्थापक सभापति ममता शर्माले रास्वपा परित्याग गरेकी छन् । आर्थिक अनियमितता र टिकट वितरण प्रक्रियामा पैसालाई प्राथमिकता दिइएको आरोप लगाउँदै उनले पार्टी परित्याग गरेको घोषणा गरेकी हुन् । 

शर्माले बुधबारदेखि लागू हुने गरी साधारण सदस्यसमेत नरहने निर्णय सार्वजनिक गरेकी हुन् । उनले पार्टीभित्र योगदान, क्षमता र योग्यता भन्दा आर्थिक पक्ष निर्णायक बन्दै गएको दाबी गरेकी छन् ।

समानुपातिकतर्फ उम्मेदवार बन्ने आकांक्षा राखेकी उनी सो सूचीमा नपरेपछि प्रत्यक्षतर्फ टिकटको दाबेदार बनेकी थिइन् । तर प्रत्यक्षतर्फको टिकट वितरण प्रक्रियामा आर्थिक प्रभाव हाबी भएको अनुभव गरेपछि आफू पार्टीमा रहिरहन नसक्ने निष्कर्षमा पुगेको उनको भनाइ छ ।

राजीनामा वक्तव्यमा उनले संगठनमा दिनरात खटिएका कार्यकर्ताको योगदानको मूल्यांकन नभएको, विधि–विधान विपरीत गतिविधि बढेको र पार्टीका सार्वजनिक प्रतिबद्धता व्यवहारमा कार्यान्वयन नभएको उल्लेख गरेकी छन् ।

‘पार्टीका निर्णयहरू मूलतः आर्थिक अनियमितताबाट प्रेरित भएको अवस्थाको साक्षी बनेर मौन बसिरहन म असमर्थ छु,’ उनले लेखेकी छन्, ‘यस परिस्थितिले मेरो आत्मसम्मान र राजनीतिक मूल्यहरूमा प्रत्यक्ष चोट पुर्‍याएको छ ।’

बारा जिल्लाकी शर्मा रास्वपाको मधेस प्रदेश संरचना निर्माणका क्रममा अग्रपंक्तिमा रहेकी नेतृका रूपमा चिनिन्थिन् । उनी पार्टीको महिला तथा सामाजिक विभागमा समेत सक्रिय थिइन् ।

‘राजनीतिमा नयाँ पुस्तालाई अवसर दिने र योग्यलाई अगाडि ल्याउने’ भन्ने नाराले आफूलाई आकर्षित गरे पनि व्यवहारमा त्यसको उल्टो देखिएको उनको टिप्पणी छ ।

आसन्न फागुन २१ गतेको निर्वाचन तयारीसम्बन्धी निर्णयहरू पार्टीको स्थापनाकालीन मूल्य र विधानसँग मेल नखाने अनुभव आफूले गरेको उनले जनाएकी छन् ।

रास्वपामा टिकट वितरण र आर्थिक पारदर्शितासम्बन्धी प्रश्न यसअघि पनि उठ्दै आएका छन् । यही विवादको पृष्ठभूमिमा काठमाडौंका नेता प्रणयशमशेर राणाले समेत पार्टी परित्याग गरिसकेका छन् ।

शर्माको राजीनामाले मधेस प्रदेशमा पार्टीको सांगठनिक सन्तुलनमा प्रभाव पार्ने अनुमान गरिएको छ । संस्थापक तहकै नेतृको बहिर्गमनले रास्वपाको आन्तरिक पारदर्शिता, टिकट वितरणको मापदण्ड र निर्णय प्रक्रियाबारे व्यापक बहस चर्किने संकेत देखिएको छ ।