काठमाडौं। नेपालमा हालै सार्वजनिक गरिएको यामाहाको पहिलो हाइब्रिड मोटरसाइकलले बजारमा अभूतपूर्व प्रतिक्रिया पाउँदै एक हप्तामै पूर्ण रूपमा ‘सोल्ड आउट’ भएको छ। उच्च मागका कारण कम्पनीले अब नयाँ ब्याचका लागि प्रि–बुकिङ पुनः खुला गरेको जनाएको छ।
यामाहा नेपालले सार्वजनिक गरेको उक्त हाइब्रिड मोडलले आधुनिक प्रविधि, उच्च माइलेज र कम उत्सर्जनको संयोजन प्रस्तुत गर्दै नेपाली बजारमा नयाँ युगको सुरुवात गरेको दाबी गरिएको छ। छोटो समयमै सबै युनिट बिक्री हुनु यसप्रतिको ग्राहक आकर्षण र विश्वासको स्पष्ट संकेत मानिएको छ।
कम्पनीका अनुसार यो मोटरसाइकल पावर, इन्धन दक्षता र वातावरणमैत्री प्रविधिबीच सन्तुलन कायम गर्ने गरी डिजाइन गरिएको हो। बढ्दो इन्धन मूल्य र शहरी ट्राफिक जस्ता चुनौतीलाई मध्यनजर गर्दै तयार पारिएको यो मोडलले दैनिक प्रयोगकर्ताका लागि व्यवहारिक समाधान दिने अपेक्षा गरिएको छ।
उन्नत हाइब्रिड प्रविधिसहितको यो बाइकले सुधारिएको प्रदर्शन, स्मार्ट फिचर र उत्कृष्ट माइलेज प्रदान गर्ने कम्पनीको दाबी छ। यसले नेपालमै सबैभन्दा बढी माइलेज दिने मोटरसाइकलमध्ये एक बन्ने सम्भावना पनि देखिएको छ।
यामाहा नेपालका कार्यकारी निर्देशक तथा प्रमुख कार्यकारी अधिकृत दीपक कुमार अग्रवालले छोटो समयमै प्राप्त भएको सकारात्मक प्रतिक्रिया उत्साहजनक रहेको बताए। “आजको राइडिङ वातावरणमा प्रविधि र माइलेजको महत्व बढ्दै गएको छ। ग्राहकबाट प्राप्त प्रतिक्रिया हाम्रो दृष्टिकोणप्रतिको विश्वासको प्रतीक हो,” उनले भने।
उच्च मागलाई ध्यानमा राख्दै कम्पनीले नयाँ स्टक छिट्टै उपलब्ध गराउने र प्रि–बुकिङमार्फत ग्राहकलाई समयमै डेलिभरी सुनिश्चित गर्ने जनाएको छ। इच्छुक ग्राहकहरूले यामाहाका आधिकारिक डिलर तथा सामाजिक सञ्जालमार्फत थप जानकारी लिन सक्नेछन्।
