काठमाडौँ । सहकारी ठगीमा संग्लन रहेका ढोरपाटन नगरपालिकाका मेयर देवकुमार नेपाली पुर्पक्षका लागि कारागार चलान भएका छन् । उनलाई पुर्पक्षका लागि थुनामा राख्न जिल्ला अदालत, बागलुङले आदेश दिएको हो ।
नेपालीको बयान सोमबार नै सकिएको अदालतले जनाएको छ । मंगलबारको थुनछेक बहसपछि नेपालीलाई कारागार चलान गरिएको हो ।
जिल्ला न्यायाधीश रमेशकान्त अधिकारीको इजलाशले नेपालीलाई पुर्पक्षका लागि कारागार चलान गर्न आदेश दिएको हो ।
इमेज बचत तथा ऋण सहकारी संस्थाको रकम अपचलन गरेको आरोपमा नेपाली शुक्रबार भारतको दिल्लीमा पक्राउ परेका थिए । उक्त सहकारीको उनी अध्यक्षसमेत हुन् ।
लामो समयदेखि फरार रहेका उनलाई प्रहरीको केन्द्रीय अनुसन्धान ब्यूरो (सीआईबी) ले भारतबाट नेपाल ल्याई जिल्ला अदालतमा सोमबार बुझाएको थियो ।
यस्तै, उनीसँगै पक्राउ परेका ओमप्रसाद दर्जीलाई भने अदालतले एक लाख ५० हजार धरौटीमा छोड्न आदेश दिएको छ ।
