काठमाडौं । दशैँ तिहारमा गाउँ फर्किनेहरूलाई सहयोग गर्नेगरी उपत्यका ट्राफिक प्रहरी कार्यालयले यात्रु सहायता कक्ष सञ्चालन गरेको छ । सहायता कक्षहरु काठमाडौं उपत्यकामा १४ ठाउँमा स्थापना गरिएको उपत्यका ट्राफिक प्रहरी कार्यालयका डीएसपी रविन कार्कीले रातोपाटीलाई बताए ।
काठमाडौंको नागढुंगा, कलङ्की, बाफल, माछापोखरी, नयाँ बसपार्क, चाबहिल, गौशाला, कोटेश्वर, बल्खु, दक्षिणकाली र सुन्धारामा सहायता कक्ष स्थापना गरिएको छ । भक्तपुरको जगाते, ललितपुरस्थित सातदोवाटो र चापागाउँमा पनि सहायता कक्ष स्थापना गरेर ट्राफिक प्रहरीले सेवा दिइरहेको छ ।
यात्रुलाई भाडाबारे जानकारी नभएमा मुख्य चोक र काउन्टर नजिकै सञ्चालित सहायता कक्षमा देखिनेगरी भाडाको सूची टाँसिएको छ । बस र अन्य यात्रुवाहक सवारी छुटेमा यात्रुलाई सो सवारीमा चढाउन सहायता कक्षका प्रहरीले सहयोग गर्छन् । धेरै भाडा लिने र सिट क्षमताभन्दा बढी यात्रु चढाउनेलाई कारबाही गर्ने अधिकार सहायता कक्षमा बस्ने प्रहरीलाई दिइएको छ ।
