काठमाडौँ । ललितपुर महानगरपालिकाले ‘साप्ताहिक ट्राफिक सचेतना’ कार्यक्रम शुरू गरेको छ । आइतबार महानगरपालिकाले जावलाखेलमा एक कार्यक्रम गर्दै ‘साप्ताहिक ट्राफिक सचेतना’ शुरू गरेको हो ।
एक सातासम्म सञ्चालन हुने यो कार्यक्रमले महानगरपालिकालाई स्मार्ट बनाउन लागि ठूलो भूमिका निर्वाह गर्ने जनाइएको छ ।
साताभर ३० जना नगर प्रहरी र १०० जना विद्यार्थी हरेक दिन यस अभियानमा संलग्न हुने जनाइएको छ । यस अवधिमा ५० हजार पम्प्लेटहरू वितरण गर्ने लक्ष्य छ ।
प्याब्सन, ललितपुर महानगरपालिका, प्रहरी परिसर जावलाखेल र काठमाडौं उपत्यका ट्राफिक प्रहरी कार्यालयको संयोजकत्वमा महानगरपालिकाले यस कार्यक्रमको आयोजना गरेको हो ।
ललितपुरलाई एकैपटक भन्दापनि यस्ता स–साना कामहरूबाटै स्मार्ट सिटी बनाउन सकिने महानगर प्रमुख चिरीबाबु महर्जनले बताए ।
‘एकैचोटी स्मार्ट सिटी बनाउन सकिँदैन । विस्तारै हुँदै जाने हो । यो अभियान साताभर भनेपनि निरन्तर चलिरहन्छ’, प्रमुख महर्जनले भने ।
