काठमाडौँ । सर्लाहीको कविलास नगरपालिकामा कर्मचारीले तालाबन्दी गरेका छन् । कर्मचारीहरुले स्तर र तह वृद्धि नगरेको भन्दै बुधबार पालिकामा तालाबन्दी गरेका हुन् ।
पालिकाले स्तर र तह वृद्धिको लागि ढिलाई गरेको भन्दै कर्मचारीहरू पालिकाको मूल ढोकामा धर्ना दिई तालाबन्दी गरेका हुन् ।
पुष महिनामै स्तर र तह वृद्धि गर्नुपर्नेमा माघ सकिनलाग्दासम्म पालिकाले आनाकानी गरेको भन्दै आफूहरू तालाबन्दी गर्नुपरेको कर्मचारीको भनाई छ ।
पालिकाले स्तर र तहवृद्धिका लागि सूचना प्रकाशित गरेको थियो । सूचनाबमोजिम आफूहरू सम्पूर्ण कागजात पूरा गरी आवेदन समेत दिएको र आजसम्म पालिकाले कुनै सुनुवाई नगरेको कविलासी नगरपालिकाका प्राविधिक सहायक रामवचन रायले बताए ।
पालिकाले स्तरवृद्धिको नाममा आलटाल गरेपछि बाध्य भएर आन्दोलनमा उत्रिनु परेको उनको भनाई छ ।
समस्या समाधानका लागि आफूले पहल सुरु गरेको नगरप्रमुख ब्रहम्देव यादवले बताए । प्रमुख प्रशासकीय अधिकृत काम विशेषले बाहिर रहेको र आउने बित्तिकै समस्या समाधानका लागि पहल गरिने नगरप्रमुख यादवले बताए । राजनीतिक उक्साहटमा आएर पालिकामा कर्मचारीले तालाबन्दी गरेको यादवको दाबी छ ।
