काठमाडौँ । बर्दियाको बार बर्दिया नगरपालिकाकामा अभद्र व्यवहार गर्ने प्रमुख प्रशासकीय दीपक आचार्य पक्राउ परेका छन् । बुधबार राती उनलाई जिल्ला प्रहरी कार्यालय बर्दियाले पक्राउ गरेको हो ।
प्रमुख आचार्यले कार्यालय समयमा मदिरा खाई कार्य भित्र टेबल तोडफोड गर्ने र हो हल्ला गरेपछि नियन्त्रणमा लिएर राखिएको जिल्ला प्रहरी कार्यालय, बर्दियाका सूचना अधिकारी एवं डिएसपी ऋषिराम घर्ती मगरले जानकारी दिए ।
‘उहाँलाई हामीले गएराति नियन्त्रण लिएका छौ, अहिले अभद्र व्यवहारमा नियन्त्रणमा लिएको हो, कुन मुद्दा चलाउने कसरी जाने भन्ने अव मेयर साहेब आएपछि छलफल हुन्छ’, उनले भने ।
उनले कार्यालयमा अभद्र व्यवहारपछि सामाजिक सञ्जालमा मेयर तथा उपमेयरविरुद्ध विभिन्न लान्छना लगाउँदै लामो स्टट्यटस समेत लेखेका थिए । पालिकाले अभद्र व्यवहारसम्बन्धी र साइबर क्राइम सम्बन्धी उजुरी दिने नगरपालिका प्रमुख छविलाल थारुले जानकारी दिए ।
प्रमुख प्रशासकीय अधिकृत दीपक आचार्यले मङ्गलवार दिउँसो मदिराले मातेर कार्यालयमा आएर उपमेयर रत्नकुमारी पाण्डेको कार्यकक्षमा गई झैझगडा गर्नुका साथै उद्दण्ड व्यवहार प्रदर्शन गरेका थिए । मेयर र उपमेयरलाई सडक छाप बनाइदिने धम्की समेत उनले दिएका थिए।
मदिराले मातेर कार्यालय आएपछि नगर प्रमुख छविलाल थारुले प्रहरीलाई खबर गरेका थिए । उनलाई प्रहरीले मङ्गलवार नै नियन्त्रणमा लिएको थियो । मापसे चेक गराउँदा प्रमुख प्रशासकीय अधिकृतले मापसे गरेको पुष्टि भएको थियो । सोही दिन साँझ उनलाई प्रहरी छोडेको थियो ।
फेरि सामाजिक सञ्जालमार्फत मेयर तथा उपमेयरलाई गालीगलौज गरेपछि मोबाइल अफ गरेर उनी सम्पर्कविहीन भएका थिए । उनलाई बुधबार राति पुनः पक्राउ गरिएको हो ।
