काठमाडौँ । राजविराज नगरपालिकाकी कार्यवाहक नगरप्रमुख इसरत परविन कार्यालयमै थुनिएकी छन्। आर्थिक वर्षको अन्तिममा शिक्षा शाखाका कर्मचारीलाई निमित्त प्रमुख प्रशासकीय अधिकृत बनाएको भन्दै कर्मचारीले विरोध गर्दै आएका छन् ।
उपसचिवको दरबन्दी रहेको पालिकामा कार्यवाहक नगरप्रमुखले शिक्षा शाखा प्रमुख भोगेन्द्र यादवलाई निमित्त प्रमुखको जिम्मावारी दिएकी थिईन ।
निलम्बित नगरप्रमुख भीमराज यादवको नेतृत्वमा आएका स्थानीयवासीले राजविराज नगरपालिकामा तोडफोड गरेका छन् ।
निमित्तलाई हाकिम नबनाउने नगरपालिकामा भ्रष्टाचार बढेकोलगायतका मागसहित यादव नेतृत्वको टोली तीन दिनदेखि तालाबन्दी गरेर आन्दोलनमा छ । ताला फोडेर आज भोगेन्द्र यादवलाई कार्यवाहक नगरप्रमुखले पदभार ग्रहण गराउन खोज्दा आन्दोलन चर्किएको हो।
आन्दोलनमा दुई पक्षबिच धकेलाधकेल र ढुंगामुढासमेत भएको छ। कार्यवाहक नगरप्रमुखसहित निमित्त कार्यालय प्रमुख अहिले प्रहरीको सुरक्षाबिच नगरपालिका भित्र थुनिएका छन्। सुरक्षाको दृष्टिकोणले यहाँ व्यापक प्रहरी परिचालन गरिएको छ।
