काठमाडौं । काठमाडौंको ऐतिहासिक तथा पर्यटकीय गन्तव्य धरहराको सञ्चालन समय साउन १ गतेदेखि ४ घण्टा थपिने भएको छ। अब धरहरा बिहान ८ बजेदेखि बेलुकी ८ बजेसम्म दुई सिफ्टमा सञ्चालन हुनेछ।
शहरी विकास मन्त्रालयका प्रवक्ता नारायण मैनालीका अनुसार अब सार्वजनिक विदाको दिन पनि धरहरा चढ्न पाइनेछ भने साप्ताहिक बिदाको दिन शनिबारको सट्टा बुधबार दिइनेछ। नागरिकका गुनासो र सुझावलाई ध्यान दिँदै धरहराको सञ्चालन अवधि बढाइएको बताइएको छ।
२०७२ को विनाशकारी भूकम्पपछि पुनर्निर्माण गरिएको धरहरा २०७९ असोज ३ गते परीक्षणका रूपमा खोलिएको थियो। गत मंसिर ९ देखि सर्वसाधारणका लागि सशुल्करूपमा पूर्ण सञ्चालनमा आएको धरहरा हालसम्म २ लाख ३७ हजार ६५ जनाले अवलोकन गरिसकेका छन्।
सात महिनाको अवधिमा धरहराबाट ४ करोड ३३ लाख रुपैयाँभन्दा बढीको राजस्व संकलन भएको छ। विशिष्ट संरचना सञ्चालन तथा व्यवस्थापन विकास समिति आदेश–२०८१ अनुसार धरहराको व्यवस्थापन भईरहेको छ।
