काठमाडौं । काठमाडौं महानगरपालिकाका मेयर बालेन्द्र साहविरुद्ध एमाले निकट युवा संघले उजुरी दर्ता गराएका छन्। युवा संघका उपाध्यक्ष महाराज गुरुङसहितका नेता तथा कार्यकर्ताहरूले मेयर बालेनले लेखेको एउटा सामाजिक सञ्जाल स्टाटसको आधारमा उजुरी लिएर साइबर ब्युरो पुगेका हुन्।
युवा संघको दाबी अनुसार, उक्त स्टाटसले राजनीतिक दलहरूको मानमर्दन गरेको र मित्रराष्ट्रहरूमाथि पनि अपमानजनक स्वरूप रहेको छ। संघले बालेनविरुद्ध विद्युतीय अपराध अन्तर्गत कारबाही गर्न माग गरेको छ।
बालेनले दुई दिनअघि मध्यरातमा अश्लील शब्द प्रयोग गर्दै गालीगलौजयुक्त स्टाटस लेखेका थिए। उनले केही समयपछि स्टाटस हटाए पनि त्यसको स्क्रिनसट सामाजिक सञ्जालमा भाइरल भएको थियो। धेरैले स्टाटसको आलोचना गरेका छन्।
