एजेन्सी । जर्मनीको पश्चिमी शहर गेल्सेनकिर्चेनमा स्पार्कासे सेभिङ्स बैंकको भल्टमा चोरी भएको छ। चोरहरूले करिब ३ करोड युरो (९५ अर्ब रुपैयाँभन्दा बढी) बराबरको नगद, सुन, गहना र अन्य बहुमूल्य सामान चोरेका छन्।
डिसेम्बर २४ को राति क्रिसमस तयारी भइरहेका बेला चोरी भएको थियो। चोरहरूले औद्योगिक ड्रिल प्रयोग गरेर बाक्लो कंक्रिटको पर्खाल फोरेर भूमिगत भल्टमा प्रवेश गरे। सुरक्षाकर्मी र अलार्म कुनै प्रतिक्रिया दिएनन्।
घटनाको जानकारी डिसेम्बर २९ को बिहान फायर अलार्म बजेपछि मात्र प्रहरीले पाए। प्रारम्भिक मूल्यांकनअनुसार करिब ३ करोड युरो मूल्य बराबरको सम्पत्ति हराएको छ। बैंकले प्रत्येक डिपोजिट बक्सका सामग्रीको १० हजार ३०० युरो बिमा भएको जनाएको छ।
स्थानीय समुदाय आक्रोशित छन् र शाखा बाहिर नाराबाजी गर्दै जवाफदेहिता मागिरहेका छन्। प्रहरीले सीसीटीभी फुटेजमा कालो अडी कार र नकाबधारी व्यक्तिहरू देखिएको जनाएको छ, तर अहिलेसम्म कोही पक्राउ परेका छैनन्।
