काठमाडौं । सुनसरीको कोशी गाउँपालिका–१ मा सशस्त्र प्रहरीको गोली लागेर ४५ वर्षीय विजय साहको मृत्यु भएको छ । साहको मृत्यु भएपछि उत्पन्न तनाव अन्त्य गर्न पाँच बुँदे सहमति भएको छ ।
भारतबाट सामान लिएर फर्कंदै गरेका उनको बुधबार राति गोली लागेर मृत्यु भएको थियो । घटनापछि भएको आन्दोलन र झडपपछि बिहीबार जिल्ला प्रशासन, सुरक्षा निकाय र पीडित पक्षबीच वार्ता भएको छ ।
वार्ताले छानबिन समिति गठन, क्षतिपूर्ति सिफारिस, मृतककी श्रीमतीलाई रोजगारी, छोरालाई सशस्त्र भर्नामा सहजीकरण र शव व्यवस्थापन गर्ने सहमति जुटेको हो ।
सहमतिपछि अवस्था सामान्य बनाउने प्रयास भइरहेको प्रहरीले जनाएको छ । यतिबेला घटनास्थल वरपर मृतका आफन्त र स्थानीय प्रदर्शनमा छन् ।
