काठमाडौं । त्रिशूली किनारमा आइतबार बिहान भएको ट्रक दुर्घटना शंकास्पद देखिएको प्रहरीले जनाएको छ । भैरहवाबाट काठमाडौं आउँदै गरेको ट्रक नारायणघाट–मुग्लिन सडकअन्तर्गत चितवनको भरतपुर महानगरपालिका–२९ को २५ किलोस्थित नदी किनारमा दुर्घटनाग्रस्त अवस्थामा भेटिएको थियो।
ना ६ ख ६२८३ नम्बरको ट्रकमा २२२५ वटा कार्टुन सनफ्लावर तेल बोकेको बिल भेटिएको जिल्ला प्रहरी कार्यालय चितवनले जनाएको छ।
ट्रकबाट लोड गरिएको तेलको बिलमा चालकको नम्बर र पु¥याउनुपर्ने ठाउँसमेतको नम्बर भेटिएको छ। प्रहरीका अनुसार चालकको र सहचालकको मोबाइल स्विच अफ गरिएको छ । उक्त सामान ललितपुरमा ल्याउन लोड गरिएको थियो ।
तेल भदौ २८ गते (शुक्रबार) भैरहवामा लोड भएको थियो। तर आइतबार दुर्घटनाग्रस्त अवस्थामा भेटिँदा ट्रक भित्र आधा तेल गायब भएको प्रहरीले जनाएको छ ।
