काठमाडौं । नेपाल नागरिक उड्डयन प्राधिकरणले विमानस्थल सञ्चालनको अवधि बढाएको छ । यात्रुको चाप बढेपछि रात्रिकालीन उडान हुने देशभरका विमानस्थलमा बिहान साढे ४ बजेदेखि नै उडान गर्न पाइने व्यवस्था गरिएको हो ।
आगामी असोज ३० गतेसम्म बाढी पहिरो तथा चाडपर्वका कारण सिर्जित बढ्दो हवाई चापलाई सम्बोधन गर्न भन्दै प्राधिकरणले बिहान साढे ४ बजेदेखि नै उडान गर्न पाउने व्यवस्था गरेको हो।
प्राधिकरणका अनुसार घटस्थापनादेखि पूर्णिमासम्म त्रिभुवन अन्तर्राष्ट्रिय विमानस्थल, गौतमबुद्ध, पोखरा अन्तर्राष्ट्रिय विमानस्थललगायत रात्रिकालीन उडान हुने सम्पूर्ण विमानस्थलहरु बिहान साढे ४ बजेदेखि राति अपरेशन समय (आवश्यकताअनुसार थप हुने) सम्म नै सञ्चालनमा आउने व्यवस्था मिलाइएको हो।
अहिले दैनिक ५ सयभन्दा बढी आन्तरिक उडान भइरहेका छन्। साथै राजमार्गहरुमा बाढी र पहिरोका कारण अवरोध भएको र दशैंमा ठूलो संख्यामा यात्रुहरुले उपत्यका छाड्ने भएकोले बिहानैदेखि विमानस्थलबाट उडान गर्न अनुमति दिइएको हो।
