काठमाडौँ । काठमाडौँ–भैरहवा उडानको टिकट एक रातमै सकिएको छ । नेपाल वायुसेवा निगम (नेवानि) ले फुलपातीको दिन काठमाडौं भैरहवा उडानका लागि भन्दै सोमबार टिकट बुकिङ खुलाएको थियो ।
सोमबार दिउँसो खुलाएको टिकट एक रातमा सबै टिकट बिक्री भएको निगमले जनाएको हो । निगमले फूलपातीको दिन बिहान ७ हजार रुपैयाँमा काठमाडौंबाट भैरहवा लैजाने ३ हजारमै काठमाडाैँ फर्कने गरी टिकट खुला गरेकाे थियाे ।
दशैँको समयमा आन्तरिक उडानको माग उच्च भएपछि निगमले फलपातीको दिन उक्त उडान गर्न लागेको हो । अन्य उडानलाई असर नगर्ने गरी एक उडान गर्न लागिएको निगमका प्रवक्ता रमेश पौडेलले जानकारी दिए ।
उनले फलपातीको दिनका लागि खुला गरिएको बुकिङ अन्तरगत मंगलबार बिहान सबै टिकट बिक्री भएको हो । काठमाडौं भैरहवा रुटमा १५८ सिट नै बिक्री भएको र भैरहवा काठमाडौं रुटका लागि भने टिकट बाँकी रहेको उनले जानकारी दिए ।
फूलपातीको दिन नेवानिले १८५ सिटे न्यारोबडी जहाजले काठमाडौं–भैरहवा–काठमाडौं उडन गर्न लागेको छ । माग उच्च भए पनि नेवानिले एउटा मात्र उडान राखेको छ । जहाज अभावले थप उडान राख्न नसकेको नेवानिका अधिकृतहरुको भनाइ छ ।
