काठमाडौं । चाडपर्व नजिकिँदै जाँदा सवारी साधन दर्ता प्रक्रियामा देखिएका समस्या समाधान गर्न नाडा अटोमोबाइल्स एसोसिएसन अफ नेपाल (नाडा) ले काठमाडौं जिल्ला प्रशासन कार्यालयसँग आग्रह गरेको छ ।
नाडाका महासचिव मिलनबाबु मल्लको नेतृत्वमा गएको प्रतिनिधिमण्डलले बुधबार काठमाडौंका प्रमुख जिल्ला अधिकारी ईश्वरराज पौडेलसँग भेट गरी सवारी साधन दर्तामा देखिएका समस्या तथा समाधानका उपायबारे छलफल गरेको हो ।
छलफलका क्रममा महासचिव मल्लले चाडपर्वको समय नजिकिँदै जाँदा यातायात व्यवस्था कार्यालयहरूमा सवारी साधन दर्तासम्बन्धी कामको चाप बढेको बताए । कार्यालयमा उपलब्ध जनशक्ति सीमित हुँदा सेवाग्राही तथा कम्पनीका प्रतिनिधिहरूको काम समयमै सम्पन्न गर्न कठिनाइ भइरहेको उनले जानकारी दिए ।
कम्पनीका प्रतिनिधिहरूले आवश्यक कागजात पेस गर्नुका साथै सवारी साधन दर्तासम्बन्धी काममा सहजीकरण गर्दै आए पनि कार्यालयको नियमित प्रक्रिया र कर्मचारीमाथिको कार्यचापका कारण दर्ता प्रक्रिया अपेक्षाकृत लामो समय लाग्ने गरेको नाडाले जनाएको छ ।
नाडाले सेवाग्राहीको चाप र चाडपर्वको समयलाई ध्यानमा राख्दै सवारी दर्ता प्रक्रियालाई सहज बनाउन तत्काल आवश्यक समन्वय र सहयोग गर्न प्रमुख जिल्ला अधिकारी पौडेलसमक्ष आग्रह गरेको हो ।
छलफलमा नाडाका सचिव तथा टु ह्वीलर समितिका सभापति मेघराज पौडेलले असोज ८ गते यातायात व्यवस्था कार्यालयका प्रमुख राजन पोखरेलसँग नाडाको प्रतिनिधिमण्डलले भेट गरी समस्या समाधानका विषयमा छलफल गरिसकेको जानकारी दिए ।
भेटका क्रममा प्रमुख जिल्ला अधिकारी ईश्वरराज पौडेलले सवारी दर्तासँग सम्बन्धित समस्याबारे सम्बन्धित यातायात व्यवस्था कार्यालयहरूसँग छलफल तथा समन्वय गरी समाधानका लागि पहल गर्ने प्रतिबद्धता जनाएका छन् ।
छलफलमा नाडाका केन्द्रीय कार्यसमिति सदस्य विमल साह तथा नाडा टु ह्वीलर समितिका सदस्य योगेन गुरुङ र दीपक रौनियारको समेत सहभागिता थियो ।
