काठमाडौँ । स्याङ्जाको फेदीखोला गाउँपालिकाले एक विद्यालय अनिवार्य एक उद्यम कार्यक्रम सञ्चालनमा ल्याएको छ ।
पालिकाको अध्यक्ष घनश्याम सुवेदीको अग्रसरतामा पालिकाले शुक्रबार वडा नं २ मा रहेको श्री महेन्द्र जनसहयोग आधारभूत विद्यालयबाट उक्त कार्यक्रमको सुरुवात गरेको हो ।
विद्यार्थीलाई व्यावहारिक शिक्षा मा जोड्दै उद्यमशीलता सिकाउने अभियान स्वरूप कार्यक्रम शुभारम्भ गरिएको पालिकाले जनाएको छ ।
पालिका अध्यक्ष सुवेदीले उक्त विद्यालयले हप्ताको एक दिन विद्यार्थीलाई बुक नल्याउने र व्यवहारिक सीप सिकाउने गरी ‘बुक फ्रि फ्राइडे’ अभियान सञ्चालनमा ल्याईएको बताए ।
उनले आफ्नै स्थानीय तहमा उत्पादित र उपलब्ध कचा पदार्थको प्रयोग गरी दुना, टपरी, कृषिजन्य उत्पादन तथा बाटेको धूप बनाउन सिकाइने बताए ।
उनी आफैले बनाएको धूप जलाएर, बनाउने अभ्यास गरेर विद्यार्थीलाई थप हौसला र उत्साह प्रदान गरेका थिए ।
हरेक विद्यालयहरुलाई एउटा एउटा उद्यममा जोड्ने गरी कार्यक्रम ल्याउने र विद्यालय सुधार योजनामा हरेक विद्यालय ले उद्यमलाई समेटेर राखेमा गाउँपालिकाले आवश्यक सहयोग गर्ने अध्यक्ष सुवेदीले प्रतिवद्धता व्यक्त गरे ।
