काठमाडौं । ललितपुरको च्यासलस्थित एक रेस्टुरेन्टमा भएको विवादले उग्र रूप लिँदा एक जनाको मृत्यु भएको छ । सोमबार राति टाउन हब रेस्टुरेन्टमा भएको विवादपछि झडप हुँदा २३ वर्षीय इन्जिनियरिङ विद्यार्थी नयन गुरुङको मृत्यु भएको हो ।
साथीहरूसँग रेस्टुरेन्ट पुगेका नयनमाथि रेस्टुरेन्टका कर्मचारी हेमराज भट्टले चक्कु प्रहार गरेको जिल्ला प्रहरी परिसर ललितपुरका एसएसपी शेखर खरेलले जानकारी दिए । डडेलधुरा स्थायी घर भएका भट्टले रेस्टुरेन्टको काउन्टरमा विवादको क्रममा एकाएक आक्रमण गरेको प्रहरीको भनाई छ । घटना राति करिब ९ः२० बजे भएको हो ।
चक्कु प्रहारपछि नयनको घटनास्थलमै मृत्यु भएको र दोषी भट्टलाई प्रहरीले नियन्त्रणमा लिई अनुसन्धान गरिरहेको छ । मृतक नयन गुरुङ ललितपुरस्थित हिमालय कलेजमा बीई चौथो सेमेस्टरमा अध्ययनरत विद्यार्थी थिए । प्रहरीले थप अनुसन्धान जारी राखेको छ ।
