काठमाडाैँ । अमेरिकाका नवनिर्वाचित राष्ट्रपति डोनाल्ड ट्रम्पले जनवरी २० मा राष्ट्रपतिको पदभार ग्रहण गर्दैछन् । यसैबिच अमेरिकाका कयौँ कलेज र विश्वविद्यालयहरू भने अनिश्चयको स्थितिमा छन् ।
ट्रम्पले राष्ट्रपतिको शपथ लिनु अघि नै अमेरिका फर्किन जाडो बिदामा घर फर्किएका विदेशी विद्यार्थीहरूलाई विश्वविद्यालयहरूले अनुरोध गरेका छन् । ट्रम्पले यात्रामा प्रतिबन्ध लगाएमा गृह देशमै अलपत्र पर्न सकिने चिन्ताबिच विश्वविद्यालयले यस्तो अनुरोध गरेका हुन् ।
अमेरिकामा ११ लाखभन्दा धेरै विदेशी विद्यार्थी पढिरहेका छन् । सत्तामा आएपछि ट्रम्पले अध्यागमन नीति थप कसिलो बनाउने कसम खाएका थिए । आफूले पहिलो कार्यकालमा मुस्लिम बहुल देशमाथि लगाएको यात्रा प्रतिबन्ध पनि ब्युँताउने उनले भनेका छन् ।
