काठमाडौं । पोखराको सूर्यदर्शन सहकारी ठगीको मुद्दामा थुनछेक बहस चलिरहँदा सरकारी वकिलको तर्फबाट तर्क राखिसकिएको छ । कास्की जिल्ला अदालतका न्यायाधीश नीतिज राईको इजलासमा बुधबार सरकारी वकिलको थुनछेक बहस सकिएपछि भोलि बिहीबार जाहेरवालाको तर्फबाट बहस हुनेछ ।
बुधबार सरकारी वकिलका तर्फबाट सहन्यायाधिवक्ता सुजाता पौडेल, शान्तिदेवी शर्मा, विपिनराज तिवारी र कमला काफ्लेले बहस गरेका छन् । नायब महान्यायाधिवक्ता सञ्जीवराज रेग्मी र उपन्यायाधिवक्ता प्रकाश गौतमले पनि बहस गरेका छन् । उच्च सरकारी वकिल कार्यालयका वकिलहरूले जवाफी बहस गर्ने भएका छन् ।
बिहीबार जाहेरवालाको तर्फबाट बहस सकिएपछि प्रतिवादीको तफैबाट बहस हुनेछ । दुवै पक्षको बहसपछि सरकारी वकिलका तर्फबाट जवाफी बहस हुनेछ । त्यसपछि बल्ल प्रतिवादीहरूलाई थुनामै राखेर मुद्दाको पुर्पक्ष गर्ने वा थुनाबाहिर राखेर गर्ने भनेर आदेश आउनेछ ।
मुद्दामा प्रतिवादी रहेका पूर्वगृहमन्त्री समेत रहेका रवि लामिछाने, पूर्वडीआईजी छविलाल जोशी, लीला पछाईं, रामबहादुर खनाल, पूर्वसांसद मीना गुरुङ, कृष्णबहादुर गुरुङ र आरती गुरुङलाई बहसका क्रममा इजलासमै उपस्थित गराइएको छ ।
पोखराको सूर्यदर्शन सहकारी ठगीमा विभिन्न संस्था समेत ४४ प्रतिवादी छन्, जसमध्ये ३१ प्रतिवादी सहकारी ठगीमा छन् । मुद्दामा १ अर्ब ५१ करोड ४० लाख रुपैयाँभन्दा बढी बिगो माग गरिएको छ ।
