काठमाडौँ । वाणिज्य, आपूर्ति तथा उपभोक्ता संरक्षण विभागले नुनको बढी मूल्य लिएको भन्दै एक मार्टलाई ३ लाख रुपैयाँ जरिवाना गरेको छ ।
विभागको टोलीले बुधबार काठमाडौँको सोल्टीमोडस्थित म्याको मिनि मार्टलाई ३ लाख रुपैयाँ जरिवाना गरेको हो । गत असार १८ गतेदेखि साल्ट ट्रेडिङ कर्पोरेशनले नुनको उपभोक्ता मूल्य बढाएको थियो ।
कर्पाेरेशनले नुनको मूल्य बढाएपछि उक्त मार्टले पुरानो स्टकमा नयाँ मूल्य राखेर बिक्री गरेको पाइएको विभागका प्रवक्ता तथा निर्देशक राकेश पाण्डेले जानकारी दिए । उक्त मार्टले पुरानो एमआरपी भएतापनि नुनको मूल्य बढाएर २५ रुपैयाँमा बिक्री वितरण गर्ने गरेको भन्दै विभागमा उजुरी परेको थियो । कर्पाेरेशनले गत असार १८ गतेदेखि नुनको उपभोक्ता मूल्य २६ रुपैयाँ बनाएको छ ।
विभागका आएको उजुरीका आधारमा अनुगमनमा जादा मूल्य बढाएको भेटिएपछि कारवाही स्वरुप जरिवाना गरिएको उनको भनाई छ ।
यस्तै, विभागले उपभोग्य मिति समाप्त भएको बस्तु बिक्रीवितरण गरेको भन्दै ताहचल स्थित मेगाा मिनि मार्टलाई समेत ३ लाख रुपैयाँ जरिवाना गरेको छ ।
विभागले नुनको एमआरपीभन्दा बढी मूल्य नलिन व्यवसायीहरुलाई आग्रह गरेको छ । साल्ट ट्रेडिङ कर्पोरेशनले नुनको मूल्य बढाएपछि व्यवसायीहरुले पुरानो स्टकमा समेत मूल्य बढाउन थालेपछि विभागले उक्त आग्रह गरेको हो ।
