काठमाडौं । अमेरिकी राष्ट्रपति डोनाल्ड ट्रम्पद्वारा जापानी वस्तुहरूमा लगाइएको भन्सार शुल्क वृद्धिले जापानलाई आर्थिक संकटमा पार्ने चेतावनी जापानी प्रधानमन्त्री शिगेरु इशिबाले दिएका छन्।
अमेरिकाले हालै जापानी कारहरूमा २५% भन्सार शुल्क लगाउने घोषणा गरेको छ, जसले जापानको अटो उद्योगलाई गम्भीर असर पुर्याउनेछ। जापानी कम्पनीहरू अमेरिकी बजारमा ठूलो लगानीकर्ताका रूपमा रहेका छन्, तर ट्रम्प प्रशासनको निर्णयले दुबै देशबीचको व्यापारिक सम्बन्धलाई प्रभावित पार्ने देखिन्छ।
प्रधानमन्त्री इशिबाले जापानी संसद्मा बोल्दै भने, 'यो निर्णयले जापानको अर्थतन्त्रलाई राष्ट्रिय संकटमा पार्न सक्छ। त्यसैले सरकारले यसको असर कम गर्न सबै सम्भावित उपायहरू अवलम्बन गर्दैछ।'
जापानी वित्तीय अधिकारीहरू र उद्योग संघहरूले अमेरिकी भन्सार वृद्धिको विरोध गर्दै जापान सरकारलाई अमेरिकासँग वार्ता गर्न आग्रह गरेका छन्। बैंक अफ जापानका गभर्नर काजुओ उएदाका अनुसार यो कर वृद्धिले विश्व अर्थतन्त्रमा नकारात्मक असर पार्न सक्छ। जापानको अटो उद्योग विश्वकै प्रमुख उद्योगहरूमध्ये एक हो। जापानी अटोमोबाइल उत्पादकहरूले गत वर्ष मात्र अमेरिका निर्यात गरेको २१.३ ट्रिलियन येन (१४२ अर्ब अमेरिकी डलर) को २८% हिस्सा सवारीसाधनले ओगटेको थियो।
जापान अटोमोबाइल म्यानुफ्याक्चरर्स एसोसिएसन (जामा) का अनुसार जापानी कार कम्पनीहरूले अमेरिकामा ३३ लाख कार उत्पादन गर्छन्, जसले लाखौँ अमेरिकी रोजगारी सिर्जना गरेको छ। जापानका अर्थमन्त्री योशिमासा हयाशीले सरकारलाई घरेलु उद्योगलाई समर्थन गर्न र व्यापार वार्ता अघि बढाउन निर्देशन दिएका छन्। उनले भने, 'हामी अमेरिकी सरकारसँग निरन्तर संवादमा छौँ, र जापानी उद्योगको संरक्षणका लागि आवश्यक सबै कदम चाल्नेछौँ।'
जापानी उद्योग संघ (जेसीसीआई) ले साना र मझौला उद्यमलाई राहत दिन सरकारलाई आर्थिक सहायता योजना ल्याउन आग्रह गरेको छ। विश्लेषकहरूका अनुसार यदि ट्रम्प प्रशासनले भन्सार दर हटाएन भने जापानले कूटनीतिक रूपमा अमेरिका माथि दबाब बढाउने रणनीति अपनाउनेछ।
