काठमाडौँ । केही दिन यता देखिएको वायुप्रदूषणका कारण आन्तरिक उडान प्रभावित बनेको छ । काठमाडौंलगायत देशका विभिन्न सहरमा उच्च वायुप्रदूषका कारण हवाई उडान प्रभावित बनेको हो ।
प्रदूषणका कारण भिजिविलिटी कम भएपछि हवाई उडान डिले हुने र रद्दसमेत भइरहेकाले यात्रुहरू विमानस्थलमा अलपत्र परेका छन् ।
पोखरा, सिमरा र भरतपुरमा उडान र अवतरण रोकिएको त्रिभुवन विमानस्थलका प्रवक्ता रेन्जी शर्पाले नेपाल प्रेसलाई बताए । अन्य ठाउँमा भने उडान नियमित छ ।
एक सातामा २२६ उडान रद्द
उच्च वायुप्रदूषणका कारण एक साताको अबधिमा २ सय २६ वटा उडान रद्द भएका छन् । त्रिभुवन अन्र्तराष्ट्रिय विमानस्थल कार्यालयका अनुसार चैत १७ आइतबारदेखि २३ गतेसम्म ७ वटा आन्तरिक वायुसेवा कम्पनीका दुईतर्फी गरी २ सय २६ वटा आन्तरिक उडान रद्द भएका हुन् ।
गौचरस्थित आन्तरिक टर्मिनल कार्यालयका अनुसार एक सातामा दुईतर्फी गरेर बुद्धले ६२, यतीले ५८, श्रीले ४०, समिटले २२, सीताले १६, ताराले १८ र नेपाल वायुसेवा निगमले १० वटा उडान रद्द गरेका छन् । उडान रद्द हुने गन्तव्यमा काठमाडौं, पोखरा, लुक्ला, भैरहवा, भरतपुर, जनकपुर, तुम्लिङटार, ताप्लेजुङ, भोजपुर, फाप्लु, विराटनगर, भद्रपुर मुख्य विमानस्थल हुन् ।
पाइलटहरूका अनुसार पोखराबाट पश्चिम धनगढी, नेपालगन्जको दाँजोमा पूर्व भैरहवा, भरतपुर, काठमाडौं, लुक्ला हुँदै भद्रपुरसम्मको आकाश प्रदूषित तुवाँलोले ढाकिएको छ । ‘काठमाडौंबाट उडेपछि ९ हजार फिटमाथि पुगेपछि मात्रै सफा आकाश देखिन्छ,’ एटीआर विमानका एक क्याप्टेनले भने, ‘त्यसभन्दा मुनि धूवाँ, धूलोको बाक्लो तह जमेको छ । उडिरहेको जहाजले भुइँ सतह हेर्न निकै तल आउनुपर्छ ।’
जहाजहरूको प्रकार तथा गतिका आधारमा उपकरणको सहायताबाट जहाजलाई अवतरण गराउन ककपिटबाट न्यूनतम १६ सय मिटर परसम्म देखिने भिजिबिलिटी आवश्यक पर्छ ।
सामान्य अवस्थामा पाइलटले जहाजभित्रबाट आँखाले देख्न सक्ने दूरी (भिजिबिलिटी) ५ हजार मिटर हुँदा भूसतह र जहाजमा उपलब्ध हुने उपकरण र यन्त्रहरूको भर नपर्दा पनि हुन्छ । बाक्लो तुवाँलोका कारण केही दिनयता अधिकांश पाइलटहरूले त्रिभुवन अन्तर्राष्ट्रिय विमानस्थलमा प्रत्यक्ष हेरेर गर्ने ‘भीएफआर’ उडान गर्न सकिरहेका छैनन् ।
५ हजार मिटरभन्दा कम भिजिबिलिटीमा उडान ठप्पै नभए पनि विमानस्थल वरिपरिको दृश्य सफा नहुँदा पाइलटहरूले प्रत्यक्ष आँखाले हेरेर मात्रै उडान गर्न नसकेर जहाज र विमानस्थलको सतहमा भएका उपकरण, नेभिगेसन यन्त्रहरूको सहायतामा आईएफआर प्रणाली अपनाउँदै उडानहरू गर्नुपरेको काठमाडौं विमानस्थलका प्रवक्ता शेर्पाले बताए ।
