काठमाडौँ । गृहमन्त्री सुधन गुरुङ आफ्नो कार्यभार सम्हालेपछि पहिलो विदेश भ्रमणका रूपमा भारत जाने भएका छन् । उनी बंगालको खाडी बहुक्षेत्रीय प्राविधिक तथा आर्थिक सहयोग पहल (बिमस्टेक) को बैठकमा सहभागी हुन भारत जान लागेका हुन् ।
गृह मन्त्रालय स्रोतका अनुसार गृहमन्त्री गुरुङ असोज २६ गते (अक्टोबर १२) भारत प्रस्थान गर्ने तयारीमा छन् । यो भ्रमण उनको गृहमन्त्रीका रूपमा पहिलो विदेश भ्रमण हुनेछ ।
भारतमा आयोजना हुने बिमस्टेक बैठकमा सदस्य राष्ट्रका गृहमन्त्रीहरूको सहभागिता रहनेछ । बैठकमा नेपालसहित बंगलादेश, भुटान, भारत, म्यानमार, श्रीलंका र थाइल्यान्डका गृहमन्त्री सहभागी हुनेछन् ।
बैठकमा बिमस्टेक सदस्य राष्ट्रबीचको सुरक्षा तथा आपसी सहयोगका विषयमा छलफल हुने अपेक्षा गरिएको छ । गृहमन्त्री गुरुङले बैठकमा नेपालको तर्फबाट सहभागिता जनाउँदै क्षेत्रीय सहकार्यका विषयमा नेपालको धारणा राख्नेछन् ।
गृहमन्त्रीको पहिलो विदेश भ्रमण भएकाले भारत भ्रमणलाई कूटनीतिक तथा क्षेत्रीय सहकार्यका दृष्टिले समेत महत्वपूर्ण रूपमा हेरिएको छ ।
