काठमाडौँ । आज काठमाडौँ उपत्यकाका सबै स्थानीय तहमा शोक बिदा दिईएको छ ।
गत बिहीबार कीर्तिपुर नगरपालिकाका मेयर राजकुमार नकर्मीको उपचारको क्रममा मृत्यु भएपछि उपत्यका भित्रका सम्पूर्ण स्थानीय तह र स्थानीय तह मातहतका निकायमा सार्वजनिक बिदा दिने निर्णय गरेका हुन् ।
काठमाडौँ उपत्यका मेयर्स फोरमले काठमाडौँ, ललितपुर र भक्तपुरका स्थानीय तहमा सार्वजनिक बिदा दिने निर्णय गरेको हो । उक्त निर्णय अनुसार आइतबार पालिका, सम्पूर्ण वडा कार्यालय तथा विद्यालयहरु बन्द हुनेछन् ।
नकर्मी विसं २०२१ असार २० गते जन्मिएका थिए । विकास प्रेमी एवं समाजसेवीका रूपमा परिचित नकर्मी विसं २०७९ को स्थानीय निर्वाचनमा कीर्तिपुर नगरपालिकाको प्रमुख पदमा निर्वाचित भएका थिए ।
