काठमाडौँ । पहलगाम आक्रमणको १५ दिनपछि भारतले पाकिस्तानमाथि हवाई हमला गरेको छ ।
भारतले मंगलबार बार राति करिब १ः३० बजे बहावलपुर, मुरिदके, बाग, कोटली र मुजफ्फराबादमा आक्रमण गरेको हो । भारतीय रक्षा मन्त्रालयका अनुसार ती सबै स्थानहरूबाट भारतमाथि हुने आतंकी आक्रमणहरूको योजना र निर्देशन भइरहेको थियो ।
रिपोर्टका अनुसार अपरेशन सिन्दूर नाम दिइएको सैन्य कारबाहीअन्तर्गत बहावलपुरमा भएको हवाई आक्रमणमा ३० जनाको मृत्यु भएको छ ।
यसैबीच, पाकिस्तानी प्रधानमन्त्री शहबाज शरिफले भारतको कारबाहीलाई युद्धको घोर उक्साहट भन्दै कडा निन्दा गरे र बलियो जवाफ दिने चेतावनी दिएका छन् ।
हवाई उडान प्रभावित
सैन्य कारबाही कारण भारतको उत्तरी क्षेत्रका प्रमुख सहरहरूमा धेरै हवाइ उडान प्रभावित भएको छ । एयरलाइन्सहरूले यात्रुहरूलाई उडान रद्द वा ढिला हुनसक्नेबारे सचेत गराएको एनडीटीभीले जनाएको छ ।
उनीहरूले यात्रुहरूले आफ्नो उडानको स्थिति जाँच गरेर मात्र यात्राको योजना बनाउन आग्रह गरेका छन् ।
एयर इन्डियाले जम्मू, श्रीनगर, लेह, जोधपुर, अमृतसर, भुज, जामनगर, चण्डीगढ र राजकोटका लागि दिउँसो १२ बजेसम्मका उडानहरू रद्द गरेको छ । अमृतसरतर्फ जाँदै गरेका दुई अन्तर्राष्ट्रिय उडानहरू दिल्लीतर्फ मोडिएको जानकारी दिएको छ ।
वर्तमान परिस्थितिको मध्येनजर गर्दै एयर इन्डियाले ७ मे दिउँसो १२ बजेसम्म जम्मू, श्रीनगर, लेह, जोधपुर, अमृतसर, भुज, जामनगर, चण्डीगढ र राजकोटका सबै उडानहरू अधिकारीहरूको अद्यावधिक जानकारी नआउन्जेलसम्म रद्द गरेको बताएको छ ।
इन्डिगोले पनि जम्मू, श्रीनगर, अमृतसर, लेह, चण्डीगढ, धर्मशाला र बिकानेरका उडानहरू प्रभावित भएको बताएको छ । स्पाइसजेटले धर्मशाला, लेह, जम्मू, श्रीनगर र अमृतसरमा विमानस्थल बन्द भएकाले उडान आगमन र प्रस्थानमा असर पर्नसक्ने जनाएको छ ।
